പത്രങ്ങളിലും വാട്ട്‌സാപ്പിലും മഞ്ഞ് വീണ് കിടക്കുന്ന മൂന്നാറിന്റെ ചിത്രം തുടര്‍ച്ചായായി വരുന്നത് കണ്ടപ്പോഴാണ് മൂന്നാറുവരെ പോയാലോ എന്ന ചിന്ത വരുന്നത്. മൂന്നാര്‍ പോയില്ലേ.. നീ എന്ത് സഞ്ചാരിയാടാ.. എന്ന പലരുടെയും ചോദ്യം യാത്രക്ക് ശക്തികൂട്ടി. മൂന്നാര്‍യാത്ര അഭിമാനപ്രശ്‌നമായി തീര്‍ന്നു.
യാത്രയോട് താല്‍പര്യമുള്ള കൂട്ടുകാര്‍ക്ക് ഉച്ചയ്ക്ക് മെസേജ് അയച്ചു ഇന്ന് രാത്രി മൂന്നാര്‍ പോകുന്നു മഞ്ഞുപെയ്യുന്നത് കണ്ടിട്ട് രാവിലെ 10മണിയോടെ തിരിച്ച് വീട്ടില്‍ എത്തും വരുന്നോ.. പലരും ആലോചനയില്‍ മുഴകി. എന്നാല്‍ മാധ്യമപ്രവര്‍ത്തകന്‍ യദു നാരായണനും പാറുവിന്റെ സുഹൃത്ത് ഹരി കൃഷ്ണനും ആലോചിച്ച് നില്‍ക്കാതെ ഡബിള്‍ ഓകെ പറഞ്ഞു. രാത്രി 12 കഴിഞ്ഞപ്പോള്‍ യദുവും ഹരിയും വീട്ടിലെത്തി. ഫുഡ് കഴിച്ചശേഷം നേരെ മൂന്നാര്‍ ലക്ഷ്യമാക്കി യാത്ര തുടങ്ങി.
ഇതാണോ തണുപ്പ് കഷ്ടം
ആനയൊക്കെ ഐസായി പോയി
പുലര്‍ച്ചെ മൂന്ന് മണിയോടെ ഞങ്ങള്‍ മൂന്നാര്‍ ടൗണില്‍ എത്തി. ബൈക്കുകളില്‍ എത്തിയ ന്യൂജെന്നുകള്‍ തണുപ്പ് സഹിക്കവയ്യാതെ ഇലകള്‍ കൂട്ടിയിട്ട് കത്തിച്ച് തീ കായുന്നുണ്ട്. കാറുകളില്‍ എത്തിയവര്‍ പുതച്ചുമൂടി അതില്‍ തന്നെ കിടപ്പുണ്ടായിരുന്നു. തണുപ്പ് അസഹനീയമായതുകൊണ്ട് പുറത്ത് ഇറങ്ങാന്‍ ആര്‍ക്കും താല്‍പര്യമില്ലെന്ന് തോന്നുന്നു. ഞങ്ങള്‍ ഡോര്‍ തുറന്ന് പുറത്തിറങ്ങി അതേപോലെ ചാടി അകത്തുകയറി. എന്താ കാറ്റുംതണുപ്പും ശരീരം മരവിച്ചുപോയി. ഹിമാലയത്തില്‍ പോയിട്ടുള്ള നിനക്ക് ഇതൊക്കെയെന്ത് തണുപ്പ് യദുവിന്റെ വക ചെറിയൊരുകുത്ത്. സംഭവം ശരിയാണ് പക്ഷേ രണ്ടും രണ്ടുതരത്തിലുള്ള തണുപ്പാണ്. രാത്രി ഉറങ്ങാതെ ഡ്രൈവ് ചെയ്തതുകൊണ്ട് കുറച്ചുനേരം മുടിപ്പുതച്ചുറങ്ങി. മൂന്നാറില്‍ തമിഴ്‌നാടിന്റെ ഭാഗമായ ടോപ് സ്‌റ്റേഷനിലേക്കാണ് യാത്ര. മേഘങ്ങള്‍ക്ക് മുകളില്‍ നിന്ന് സൂര്യോദയം ദര്‍ശിക്കാമെന്നതാണ് ഇവിടത്തെ പ്രത്യേകത. പക്ഷേ അവിടെയെത്തണമെങ്കില്‍ ആനക്കാട് കടന്ന് പോകണം. രാത്രി ആന വഴിയില്‍ കാണുമെന്ന് പറഞ്ഞു യദു യാത്ര വിലക്കി. യദു നല്ല ഉറക്കം പിടിച്ച തക്കംനോക്കി കാര്‍ മുന്നേട്ട് എടുത്തു. മൂന്നാറില്‍ നിന്ന് മട്ടുപ്പെട്ടിയിലൂടെ വട്ടവടയ്ക്കുള്ള റൂട്ടില്‍ 37 കീലോമീറ്റര്‍ സഞ്ചരിക്കണം ടോപ് സ്റ്റേഷനില്‍ എത്താന്‍. വഴിയില്‍ ഉടനീളം ആന റോഡ് മുറിച്ചുകടക്കാന്‍ സാധ്യതയുണ്ടെന്ന മുന്നറിയിപ്പു ബോര്‍ഡുകള്‍ ദൃശ്യമായിരുന്നു. ഇടക്ക് എപ്പോഴോ ഉറക്കമുണര്‍ന്ന യദു അന്താളിച്ച് റോഡിലേക്ക് നോക്കി. നോക്കണ്ട ഉണ്ണിയെ ആ ആനക്കാട്ടിലൂടെ തന്നെയാണ് നമ്മള്‍ പോകുന്നതെന്ന് ഞാന്‍. ടെന്‍ഷന്‍ കയറി അവന്റെ ഉറക്കംവരെ പോയി. ഒരോ വളവിലും 'പതിയെപോടാ ആന നില്‍പ്പുണ്ടാകും' എന്നു പറഞ്ഞുകൊണ്ടിരുന്നു. ഈ തണുപ്പത്ത് ആനയൊക്കെ ഐസായി പോയി ഇനി വെയില്‍വരണം അത് പഴയപടിയാകാനെന്നു പറഞ്ഞു അവനെ ആശ്വസിപ്പിച്ചു.
രാജകീയ സുപ്രഭാതം
ആറുമണിയോടെ തമിഴ്‌നാട്ടിലെ തേനി ജില്ലയില്‍ സ്ഥിതി ചെയ്യുന്ന ടോപ് സ്റ്റേഷനില്‍ എത്തി. ഞങ്ങളെ ആദ്യം ഞെട്ടിച്ചത് ഇവിടുത്തെ തണുപ്പാണ്. സാധാരണ ഹില്‍സ്റ്റേഷനില്‍ ഉള്ള തണുപ്പുമാത്രമേയിവിടെയുണ്ടായിരുന്നുള്ളൂ. കാര്‍ വഴിയില്‍ പാര്‍ക്ക് ചെയ്ത ശേഷം സൂര്യോദയം ദൃശ്യമാകുന്ന സ്ഥലത്തേയ്ക്ക് നടന്നു. കേരള തമിഴ്‌നാട് അതിര്‍ത്തിയായതുകൊണ്ട് രണ്ടുകൂട്ടരും ഈ പ്രദേശത്ത് അവകാശം ഉന്നയിച്ച് രംഗത്ത് വന്നിട്ടുണ്ട്. ടിക്കറ്റ് എടുക്കാതെ കേരളത്തിന്റെ അധീനതയില്‍ ഉള്ള പ്രദേശത്തും ടിക്കറ്റ് എടുത്ത് തമിഴ്‌നാടിന്റെ അധീനതയിലുള്ള പ്രദേശത്തും നിന്ന് സൂര്യോദയം കാണാം. രണ്ടും രണ്ടുതരത്തിലുള്ള കാഴ്ചയാണ്. 40 രൂപയുടെ ടിക്കറ്റ് എടുക്കുന്നത് നഷ്ടമില്ല. ടിക്കറ്റ് എടുത്ത് കുന്നിന് താഴേക്ക് നടന്നു. തലേദിവസം വന്ന് ടെന്റ് അടിച്ച് താമസിക്കുന്നവര്‍ അനേകം ഉണ്ട്. ആവരുടെ ആഘോഷത്തിന്റെ ബാക്കിപത്രമെന്ന നിലയില്‍ മദ്യക്കുപ്പികള്‍ അവിടവിടായിക്കിടപ്പുണ്ട്. കുന്നിന് ചെരിവ് വിനേദ സഞ്ചാരികളെക്കൊണ്ട് നിറഞ്ഞിരിക്കുകയാണ്. താഴ്‌വാരത്തില്‍ ഉള്ള ഏതോ അമ്പലത്തില്‍ നിന്നും തമിഴ് ഭക്തിഗാനം നിശബ്ദതയെ കീറിമുറിച്ചുകൊണ്ട് മേഘപാളികള്‍ക്കിടയിലൂടെ കുന്ന് കയറി വരുന്നുണ്ട്. മേഘപാളികള്‍ സൂര്യനേയും കാത്ത് കിടക്കുന്നു. 6.30ഓടുകൂടി ഇടതുവശത്തുള്ള രണ്ടു മലകള്‍ക്കിടയിലൂടെ സൂര്യഭഗവാന്‍ ഉദിച്ചുയര്‍ന്നു. സ്വര്‍ണ്ണരശ്മികളില്‍ തട്ടി എതിര്‍വശത്തുള്ള മലനിരകള്‍ സ്വര്‍ണനിറത്താല്‍ മനോഹരിയായി. ഒഴികി നടന്ന മേഘപാളികള്‍ വെണ്ണക്കട്ടപോലെ ഉരുണ്ടുപൊങ്ങി. മേഘപാളികള്‍ താഴെനിന്ന് ഉയര്‍ന്ന് മലമുകളിലേക്ക് കയറിവരുന്ന കാഴ്ച നയനമനോഹരമാണ്.
എവിടെ..? ഐസ് എവിടെ..?
ശ്രദ്ധിക്കേണ്ടത്
- പുലര്‍ച്ചേ ഐസ് വീണുകിടക്കുന്നത് കാണുകയെള്ളൂ. സൂര്യന്‍ ഉദിച്ചുകഴിഞ്ഞാല്‍ അലുത്ത് പോകും.
- എവിടെയാണ് ഐസ് വീഴുകയെന്ന് പറയാന്‍ പറ്റില്ല. തുടര്‍ച്ചയായി ഇരവികുളം പ്രദേശത്തും യെല്ലപ്പെട്ടി പ്രദേശത്തും ഐസ് വീഴുന്നതായി പറയപ്പെടുന്നു.
- ചുമ്മാ നോക്കിയാല്‍ പുല്ല് ചീഞ്ഞ് കിടക്കുന്നതായേ തോന്നു. വാഹനം നിര്‍ത്തി പരിശോധിച്ചാലെ ഐസ് ആണെന്ന് മനസിലാകൂ
No comments:
Post a Comment